全臺唯一的水族陣，是西港刈香真有名的陣頭。毋過受著少囝化的衝擊，真僫組團，致使已經三科無出陣矣。南海社區發展協會，利用水族陣內底的動物做瓷仔門牌，向望提升逐家對陣頭的認同感，嘛積極參在地學校接接，欲開課程來傳承。(本篇新聞標題、導言、內文皆為臺文)
沿臺南西港區南海街行，一路看去過逐戶煞有兩塊門牌真特殊。詳細看門牌頂懸有金紅色的鯉魚，閣有蚶仔佮蟳仔，每一戶攏獨一無二，其實遮是全台唯一水族陣內底的動物。南海社區發展協會，in結合在地水族陣特色做門牌，向望增加逐家對陣頭的認同感。
在地序大講，「做蚶仔、做蟳仔，是水族陣內底的動物，對開始到成果起來三個月。」
臺南市西港區南海社區發展協會總幹事黃光暉說明，「袂講因為無出陣抑是無組立，逐家共袂記，佇南海街有咱水族陣，動物的造景意象出來了後，差不多南海街逐家會感覺，水族陣攏有來到。」
其實南海水族陣已經有56冬久，每若西港香攏有濟濟人會倚過去看，毋過到今已經三科無出陣矣，in的特色是文武陣，閣兼以民俗歌仔戲戲劇元素表演為主。根據了解，每若出陣上少愛30个人，廟方表示，這馬真僫揣人願意加入，致使in先打造「南海文物館」，共服裝、兵器等文物先保存落來做展示。協會嘛拼勢參在地學校接接，向望共傳統文化向下釘根。
臺南市西港區南海社區發展協會理事長葉金火也講，「這馬就是老師的時間無法度，伊干焦拜六禮拜有閒爾，所以無法度入去訓練。」
臺南市西港國小校長郭國成強調，「希望參社區結合透過阮的歇熱的育樂營，抑是拜三下晡的社團活動，共傳統的水族陣武陣佮文陣紮入來校園。」
國家重要民俗台南「西港香」明年欲起鼓，這改水族陣到底敢會出陣，嘛引起地方討論。廟方回應，人數目前閣無夠，暫時無規劃。in講會拍拼組團，趕緊恢復進前的光景。