臺南特有「做16歲」民俗將欲起鼓囉，開基臨水夫人媽廟提早請出「教母亭」，欲予16歲的少年家來軁。廟方指出，這座是全台唯一的六角塔型木造結構的教母亭，干焦佇舊曆七月才請出來，到今已經有30冬的歷史。（此則新聞標題、導言、內文皆為臺語文。）
囡仔當咧進行出教母宮儀式，就愛軁三改，落尾由序大牽起來才算完成。做16歲是府城特有的儀式，一般看著的教母亭攏是用紙糊的，毋過佇咧開基臨水夫人媽廟，煞有全台唯一的六角塔型木造結構的鳥母亭，這座有3公尺懸、上百公斤重，干焦佇舊曆七月才看會著。
囡仔：「感謝予我保佑平安」
開基臨水夫人媽廟主委 戴振源表示「紙糊的足ﰈ挵破，所以變做著愛定定佇遐糊、佇遐補，所以落尾阮遮的老前輩就講，無咱就用柴來刻按呢 而且嘛較永久，以後嘛會變做古董按呢。」
這座教母亭是用插榫浮雕式組合起來，上下層除了有床母佮武身的臨水夫人咧坐鎮，嘛有濟濟賜福意涵的圖樣，規个雕刻攏做甲真幼路。廟方表示，這座有30冬歷史，早前用牛樟仔、hi-nóo-khih等木質落去做，因為年久失修、色水退色去，IN拍算做16歲儀式結束了後，欲委託木雕師來修復。
木雕師劉進文：「金仔、金箔仔攏歹甲蓋嚴重，所有伊的金箔仔到這馬已經落去矣，所以委託我今年來做安金的部份，閣有伊落去的部份、斷去的部份原仔蓋濟。」
為期一個月，廟方開放16歲的囡仔來軁教母宮，祈求平安。透過古禮，保留傳統習俗，嘛予逐家看著無仝的在地文化。