有285年歷史的縣定古蹟，彰化南瑤宮，廟方發現正殿、護龍、三川殿的大木結構佮壁堵，濟濟所在攏有損害，南瑤宮也佇6/5舉辦整修工程、開工典禮，總經費6千5百外萬，按算2年內完工。（此則新聞標題、導言、內文皆為臺語文。）
手攑清香誠心拜拜，遮是有285年歷史的縣定古蹟，彰化南瑤宮，因為年久月深，廟內的柴頭結構、閣有壁堵、剪黏攏損壞嚴重，舊年中(2022)文化部落南會勘，通過修復工程的補助申請，佇六月初五舉辦開工典禮。
文化部文資局長，陳濟民表示：「確實這兩百外年的歷史當中，這一、二十年來，因為無進一步來修復，所以有一寡仔所在確實是需要修復。今仔日阮嘛真歡喜，算是用真緊的時間佇今仔日會當開工，這是真無簡單。」
修復工程會針對正殿、護龍佮三川殿來做結構的加強，包括解決厝頂漏水、白蟻、柴柱必開的問題。
建築師，詹益寧表示：「其實上困難的部份是這擺正殿，咱知影彼个點金柱邊仔開始咧必，所以有必巡的物件愛先踮遮共修理予好，無咱媽祖婆蹛佇內底伊嘛會無啥歡喜。」
彰化市公所表示，這擺的工程算是第一期，總經費是6557萬箍，由文化部補助七成，賰的由縣府補助491萬7750箍、彰化市公所家己傱1475萬3250箍，預計佇兩冬內完工，彩繪、泥塑、剪黏的項目，會安排佇紲落來的第二期工程。