臺灣予外國人講是「過路人的地獄」，為著改變這个歹名聲，基隆市對3月開始，也推行一種青底白巡的過路線，看起來較影目，希望會當增加過路人的安全。只是講:畫這款過路線的價數，比一般的貴三倍。所以目前先對學校、基隆廟口，遮的路口先改變。(這則新聞標題、前言是臺語文。)
基隆市安樂區建德國小邊仔的路口，有這種青色底的斑馬線，並一般的烏白斑馬線，看起來是較顯目。這是基隆市對3月開始推行的青色斑馬線，予行路人較好予人看見。
基隆民眾簡先生說講:「青色的咱咧看，人較會去注意著。」基隆民眾呂小姐講:「伊袂規个攏是點仔膠的色，囡仔較會予人看見。」基隆市政府交通處長王圳宏講:「尤其是暗時，伊的視覺效果非常好，駕駛佇較遠的所在，就看有青色斑馬線，伊內底有濫玻璃珠，佇暗時會反光，會提醒、會較顯目。」
現此時基隆市對先對學校附近、佮有基隆廟口、這寡仔重要路口先施行；毋過這款斑馬線也予民眾煩惱，並一般的斑馬線、敢會較滑？
基隆民眾呂小姐講:「我會減速，用路人安全，毋過若是像騎車族群，可能就較無遐爾理想。」
有色彩的斑馬線佇日本、歐美國家，攏有咧使用，台灣自2017年開始，也有縣市陸續推動。基隆市政府表示，佇設計的時，也有調整成份，予安全性比法規的標準閣較懸。
基隆市政府交通處長王圳宏講:「（一般規定)本成是50(抗滑係數)，這馬(青色斑馬線)攏搝到65，所以基本上機車佇頂懸騎袂滑。」
毋過王圳宏表示，這款青色斑馬線，比一般的烏白斑馬線的價數，是貴三倍，佇經費有限的狀況之下，已經向中央爭取經費，後半年希望會當全面規劃、宇閣較濟所通施行。