大甲媽到嘉義新港 今年參加民眾比往過加3倍

大甲媽的神轎拄過崙仔橋，炮仔連鞭就點起來，數萬名信眾攏佇橋頭來接駕，大甲鎮瀾宮董事長顏清標就表示，今年參加的信眾，比往過加三倍。

大甲鎮瀾宮董事長顏清標表示：「全世界三大宗教活動，所以這回追隨咱大甲媽來到新港，佮新港媽會香，會使講人數，超過過去人數的三倍以上，準備食的攏食無夠。」

繞境上大的特色之一，就是沿途食的物件，五花十色。舊年因為疫情的關係，所以提供的食物攏是會當紮咧食的物件，這馬解封了後，誠濟擔仔的食物，嘛恢復往過現炒、現煮、欲予繞境的人會當吃予飽。

新港信眾許小姐表示：「阮準備的物件差不多，有三千到四千人以上的量，兩工大約有三 四千人以上的量，敢會煩惱無夠通食，按過去的經驗是袂啦，阮攏閣會有賰。」

新港信眾李小姐表示：「舊年是因為疫情的關係，所以阮用素粽佮麭，因為按呢予逐家來紮走，今年疫情解封，所以阮猶是恢復原本，用現煮的方式。」

疫情解封，今年參加繞境的信眾，比舊年閣較濟，信眾真熱情，大甲媽到新港的時陣，閣因為橋邊放炮仔，引起雜草的火災，消防人員接著通知嘛趕緊來拍火，佳哉無大礙。25早時八點，大甲媽嘛會按照行程，佇新港奉天宮來舉辦祝壽大典。