明日起鋒面到位 西部摔大雨.通略仔消敨水情

今仔日好天，溫度高、袂輸熱天，毋過明仔載就欲變天!
氣象局表示，19開始、受華南附近的鋒面倚近台灣，明仔載早起各地氣溫猶是燒熱，甚至因為西南風增強，閃風面的東南部、可能有燒風發生的機會，抑若明仔載中晝過後、西半部山區、就會開始落大雨。
簡任技正 伍婉華：「尤其19佇西半部山區，會有局部性的大雨，20西半部佮東北部地區，落雨時間長，會有短時間的強降雨。」
照圖面來看，19開始，西半部呈現柑仔色、雨量較濟，氣象局也表示，這波雨水、是入春較強的春雨，全台灣會落雨落三工，到22、鋒面才會離開。
抑若這波春雨、敢有法度紓解水庫欠水的問題，是外界上關心的代誌。
經濟部水利署發言人 王藝峰：「整體洘旱欲解除，阮猶是會期盼5月底到6月初可能會到的黃酸仔雨。」
根據水庫即時水情，中南部，親像明德水庫、曾文水庫攏是紅燈。經濟部水利署也表示，照中央氣象局統計，三月全台的雨水量是歷史上第二低，目前佇中、南部有實施夜間減壓、節水等措施來管制。也會用各項調度來減少欠水的影響。