元宵賞花燈 今年平溪天燈節閣推出兔年雙主燈

十五上元暝，2023年的平溪天燈節欲共這對懸度六公尺的兔仔佮紅菜頭飛上天頂。斟酌共看，兔仔的手裡是提「愛在元宵兔給樂(together)」的春聯，代表迎向吉祥佮希望。製作的老師講，圓身的兔仔真需要功夫。

天燈製作老師 胡民樹：「闊度90公分三角的紙，應該超過三百張，三百張的紙共伊黏做兩个圓，閣有耳仔做起來真歹做，阮有佮紙廠研究過，有加濕強劑閣有加一寡長纖，無這兩項物件就算做起來，你拄著落雨嘛飛袂去去。」

新北市觀光旅遊局表示，二月初五暗時將欲佇十分廣場放天燈。疫情解封以後，預計來看燈的人會比舊年加一倍，而且為著予活動閣較趣味，放天燈的過程有經過特別設計。

新北市觀旅局長 楊宗珉：「會搬一齣戲，就是兔仔逐彼支紅菜頭，紅菜頭代表喜氣，台語講紅菜頭，希望予逐家一个好彩頭，這兩三冬受著疫情影響，今年希望回流去年人潮大概300萬，會當因為疫情轉和 人會當回復加倍，阮希望回復到疫情進前700萬的人潮。」

元宵祈福，活動現場嘛會提供百外个兔仔剪影的天燈予民眾來放，當日早起10點開放登記領券。