根據臺灣頭疼學會的統計，臺灣真濟人會頭疼、鬢邊鑠鑠叫，嘉義基督教病院這陣成立南臺灣頭一間「頭疼中心」，希望用正確的觀念，協助民眾來認捌佮治療。
中醫師用針灸來排解偏頭疼的無爽快，偏頭疼是袂少現代人加減會拄著的問題，台灣偏頭疼的盛行率大概是9.1葩，醫師表示，出現偏頭疼的症頭，毋但影響著生活，而且閣會遺傳。
偏頭疼患者 潘女士表示：「我本來叫是我的頭殼內底生歹物仔，結果毋是。我的查某囝嘛是定定講伊頭疼，嘛是檢查了後發見講，嘛毋是頭內底生歹物仔，是佮我仝款，遺傳著我」
嘉義基督教病院這陣特別整合神經內外科、精神科、復健科佮中醫等單位，成立中南部第一間頭疼中心，希望幫助民眾閣較了解這項症頭，進行正確的治療。
嘉義基督教醫院頭痛中心主任 許永居指出：「偏頭疼上嚴重的病尾就是驚中風，因為偏頭疼是一種血管性的頭疼，若講真正是長新冠引起的頭疼，有這種症頭的人一定愛注意，這號做急性頭疼」
醫生講，偏頭疼發生的原因誠濟，一般民眾大部份攏是食止疼藥仔來處理，毋過新冠肺炎的後遺症，嘛攏有頭疼的症頭，若干焦靠止疼藥，無詳細檢查，症頭可能會愈來愈嚴重。呼籲民眾愛特別注意。