高雄防疫包隨來隨領 38站咧分.1點鐘分251份
發布時間：
更新時間：
高雄的確診人數已經超過3千人 ，高雄推出全臺灣第一个關懷物資站，高雄38个行政區攏有設，會當直接去區公所所設的關懷物資站領物資佮快篩。今仔日頭一工施行雖然搪著落大雨，毋過來領的民眾猶是真濟。
來領關懷包，第一關愛核對確診者佮代領民眾的身份，不管你是騎oo-tóo-bái抑是駛車、行路來，現場有分流，確定資料無問題，公所準備好關懷包佮快篩試劑。毋過現場猶是有狀況，有民眾三工前確診，嘛來領關懷包。
原來等無里幹事送關懷包的民眾袂少，毋過市府表示，關懷包得來速，愛初十下晡五點以後的確診者，接著通知兩點鐘後就會當請親友來代領，關懷包有酒精、泡麵佮點心，閣有予厝內人的快篩試劑。
苓雅區區長 鄭美華：「因為里幹事進前送到厝，其實有淡薄仔走袂開跤。這个由厝內的人，抑是親朋好友來領取站來領，時效較懸。」
高雄市確診人數衝懸，「關懷包得來速」頭一工，一點鐘就發出251份，干焦苓雅區到中晝就發出1200份，公所表示，至少準備兩百份，若是確診增加，會隨時補充。
