"島嶼江湖:武俠在台灣"展覽武俠片 講古說傳奇
鄭雅文 林郁凱 / 新北報導
發布時間：
更新時間：
國家電影及視聽文化中心最近展出《島嶼江湖：武俠在台灣》展覽，用電視、電影、廣播等等，紹介武俠劇佇臺灣的演變；影視聽中心閣倩講古老師張宗榮，重新製作往過出名的廣播劇《錢來也》，做伙來看覓。
展場模擬電影龍門客棧的景、也有囥彈跳床來解說彼陣是按怎拍飛天掛桷的場面。國家電影佮視聽文化中心最近展出佮武俠劇相關的展覽，內容包括廣播、電視佮電影，親像電視武俠劇，就有特別的發展歷程。
研究組專員 鄭慈瑤：「頭一改就是講，咱本土的電視劇以武俠來做主題；第二改就是講，咱參台灣參香港的無仝款，去相比並；第三改就是講，像逐家較知影的神鵰俠侶抑是楚留香，做一个經歷，就是IN經過無仝款的歷史的演變。」
第一波電視武俠劇的開端就是台語武俠劇，後來因為予警備總部佮新聞局祭出禁止暴力等等限制，熱潮退燒。另外嘛有廣播劇，影視聽中心特別倩較早講古誠知名的張宗榮老師佮伊的團員，將五六空年代觀眾真愛的錢來也重配音，予老戲迷重溫過去。
研究組專員 鄭慈瑤：「伊閣揣師傅去畫，用畫的方式，畫連環圖，用連環圖剪接、配音。廣播劇遐的團員錄的音，會當共遐的武俠招式紹介甲真詳細。」
用講古的方式搭配影像，展覽也結合互動體驗，民眾只要用手機仔操作，也通看著一寡仔珍貴電影的修復部份，而且嘛通角色扮演，希望逐家對武俠劇對過去到今的演變有閣較深的了解，展期到4月底。
