雪霸國家公園櫻花開唌人目 濟濟遊客到地參觀

撨姿勢把握時間，趕緊共一年大開一擺的櫻花王記錄落來。這欉80歲的櫻花樹仔，懸14公尺，是台灣特有種，逐年3月大開，攏吸引真濟人上山來 tshit-thô。

遊客：「其實已經接近開滿，本來想講前幾工，櫻王敢若閣差一點仔，然後發現櫻后已經滿開，若按呢就先來看櫻后，後擺才來看櫻王」。

遊客：「阮頂擺有去武陵看櫻花，彼爿就是粉紅色較濟，這邊看著白色的霧社櫻，感覺真特別嘛真媠」。
這幾工好天，來看花的遊客實在太濟，林管處開始做總量管制，避免山區窒車，園區嘛特別整理環境，欲予遊客耍了閣較歡喜。

山莊業者 蕭宜峯：「霧社櫻王解說牌仔是寫80年以上，毋過牌仔已經掛欲20冬，你看這有偌濟年，阮特別共道路修整過，比較安全」。
在地人講目前花期差不多賰一禮拜，民眾若是想欲來看霧社櫻花，就愛把握時間，無著閣愛等一年囉。