陽明山花季今日起鼓 櫻花期按到3月中

陽明山的花季今仔日開始矣,今年因為天氣較寒,櫻花較早開,花期大約佇3月中結束。另外,臺北的士林和大安森林公園,也有鬱金香、繡球花通好欣賞。

一蕊一蕊紅摻粉的櫻花開矣,共陽明山公園妝娗若一幅圖,雖罔雨落無停,不過民眾看花的心情,一點仔都無受影響。

看花民眾:感覺啥款「猶袂bai2,雨天袂bai2,有另外一種詩意」。

看花民眾:「足媠,足浪漫」。

記者 洪敏真:「民眾這馬到草山,花季開始矣,會當一路看無仝花期的花,一直看到3月20花期結束」。

陽明山花季已經辦超過60年,是台北歷史上久的花季,公園處表示對2月17開始,山櫻、八重櫻、日本櫻花和大蕊櫻花攏會相紲開到三月下旬。

台北市公園處花卉試驗中心主任 宋馥華:「今年是櫻花開甲較早,種差不多2000外欉,2000外欉內底山櫻花是上濟的,欲倚六成」。

鏡頭來到士林官邸,門口這大型的荷蘭風車佮色彩豔麗的歐仔花也予民眾翕無停,對2月18開始,遮嘛有10工的花展,超過20个品種、13萬欉歐仔花。若準看無夠,台北大安森林公園內底,猶有用繡球花和滿山紅打造的砂石仔步道的心型花區會當看來鬥。

台北市工務局公園處青年公園管理所主任 王淑雅:「佈田花心的邊仔,有做一个七大品種區,平戶杜鵑、皋月杜鵑,久留米杜鵑猶有臺交啦,沓沓仔到2月28進前,大安森林的花況會是上好的」。

臺北市政府表示花季期間,出入口攏會加派人力,控制人數,也請民眾一定愛落實徛名制和防疫工課。


 

全台敬老金大調查

相關新聞