新竹有男性刁工提斧頭刜神像 廟方:傷過惡質

監視器翕著這个查埔人看起來無各樣，後一秒竟然攑斧頭就對神像刜落去，神像的頭頂明顯缺一角，毋但按呢，另外兩尊神像佮義民爺的牌位，嘛受著惡意破壞。

金錦山義民廟廟祝謝先生：「三尊神像閣有一支義民爺牌位，總共四件神像予斧頭破壞，攏會重閣刻。」

金錦山義民廟副主委蔡先生：「真可惡，這馬偵查無公開。根據我的了解是咱當地人，有地緣關係。」

這間佇在地有百年歷史的義民廟，是民眾定定來參拜的信仰中心，舊年11月有人刁工破壞。想袂到200公尺以外的土地公廟，嘛發生仝款的代誌。

附近居民：「愛換新的。土地公真重，阮先剉竹仔，明仔日欲先共伊請到桌頂，袂使囥佇塗跤。」

警方接著報案，已經對監視器畫面鎖定對象，通知有相關的人到案說明，兩間廟敢是仝一个人犯案，目前需要閣再掰予清。