毋甘300年三合院崩塌 厝主開20冬整修祖厝

磚仔頂面的圖樣用刀仔沓沓仔共磨，這間厝內底有各種無仝款制的磚仔，攏是這位塗水師，一个人一塊一塊慢慢仔疊起來。因為毋甘百外冬的祖厝害去，所以只要有閒就轉來修理，這一做就做了20冬。

朴子慶儀老厝厝主李慶儀：「怪手來就差不多一兩點鐘就全攏毀成平埔矣！以後嘛一定生草。我這馬我就想講，抑無我共起起來。若欲起就規个到尾仔就一定總起。」

這間老厝內底閣看會著用粟殼糊的壁，當初因為傷舊崩去，本身會曉做塗水的厝主，毋但用磚仔來展示功夫，嘛展現創意。予這間百外坪的老厝，成做朴子市一間誠有特色的建築。

嘉義縣朴子日新文化協會理事長陳俊哲：「以前咱古早的廟、古早的埕斗有人做按咧，猶毋過這項技術已經斷去矣、無人咧做矣。所以這馬閣共恢復起來，閣用咱傳統的一个懷舊也好、猶是鼓勵也好。會當教育咱的後代，予後代來遮看。」

室內室外的壁，攏用磚仔做出無仝的花草，埕斗外口的窗花，每一堵嘛攏無仝款，甚至閣用磚仔來做斗拱，厝主開20冬的時間沓沓仔修整老厝，閣用創新的作法，予疊磚仔起厝的工藝，展現無仝的美感。