客家義民祭典8月27透早佇新竹縣新埔義民廟舉行，總統蔡英文、行政院長蘇貞昌攏來到現場參加。蔡英文表示，今年雖然祭典儀式受著疫情影響，毋過應該更加數念義民爺團結的精神，政府佮人民做伙拍拚控制疫情、穩定經濟。
一年一改的義民祭典，是客家族群非常重要的日子，雖然今年受疫情影響，祭典規模並過去縮減，毋過重要的儀式，包括祀(tshāi)燈篙、放水燈閣有豬公比賽，攏照常舉行。
義民廟董事長林光華：「佇疫情轉劇烈的時陣，美國、日本、立陶宛各界攏支持支援，當然嘛感謝第一線的防疫人員，台灣真正是福地。」
總統蔡英文嘛來到現場，祈求義民爺保庇台灣風調雨順、國泰民安，嘛感謝執政團隊的努力，予疫情得到控制。
總統蔡英文：「今年以來逐家攏做伙度過，台灣面對疫情水情以及風災的挑戰，因為有逐家的共同拍拚，政府佮人民共同努力齊心面對，咱才有法度會使守護家園」
受疫情影響，今年的豬公比賽賰22个單位參加，而且廟內限制100人，廟外上濟嘛干焦500人，希望佇誠心祭拜的同時，兼顧防疫。