艋舺地區的茶館，因為疫情暫停營業，到今欲3個月阿。臺北市政府也講，欲分做三階段，沓沓仔輔導，按算9月就有一寡業者會當恢復營業。市府嘛強調，茶館的服務一定愛單純。
鐵門攏拖落來，門口貼暫停營業的公告，遮是艋舺地區的茶館區，因為過去袂少確診案例佇遮行踏過，已經關門真久矣。這馬台北市政府宣佈開始規劃，希望佇9月份予業者漸漸恢復營業。
艋舺當地的民眾認為：「欲恢復當然是好，無阮無錢通趁，租厝愛錢啊」
臺北市副市長蔡炳坤表示會透過三个階段：第一階段是溝通宣導、第二階段是復業輔導、第三階段是稽查管理。蔡炳坤也強調，過程會嚴格要求業者，袂使有色情的內容，商業登記嘛愛佮實際符合，向望用這種方式，去除茶館的污名、恢復予序大開講的功能。
臺北市衛生局食藥管理科科長陳怡婷指出：「主要猶是輔導業者，符合市府佮中央相關的法規。針對伊相關的復業時間、防疫標準佮業者注疫苗的部份，這部份全部攏是按照中央的規定」
衛福部長陳時中是表示：「八大行業目前猶毋是咱開放的項目。市府對地區的文化、地區的狀況有較了解，若是in有啥物想法，會使來佮阮討論」。
蔡炳坤表示，業者有成立自治會，佇防疫、自律頂懸用心。市政府希望會使趁這擺的機會，佮業者充分溝通，予已經有一甲子歷史的艋舺茶館文化重新開始，符合所有民眾的期待。