高雄風景區設人流燈號 人陣濟少網路隨查有

雖罔是平常日，高雄駁二倚海邊遮，已經會當看著老爸tshuā囡仔抑是厝內人做伙出來行行，防疫降級，戶外景點攏開放矣，毋過猶是有民眾淡薄仔驚驚。

民眾:「避開人潮，揀這个時陣出來看海，真正是鬱傷久矣，特別揀這个時間出來，嘛毋敢去百貨公司。」民眾:「因為無到規个清零，猶是感覺有淡薄仔危險。」

猶是有人毋敢假日出遊，毋過棧貮庫頂禮拜解封前的歇睏日，遊客已經有三成。高雄港區土地開發公司行銷企劃謝孟翰:「頂禮拜遊客是已經明顯提升大概三成，預期這个歇睏日，希望恢復往過五成的遊客。」

遊客沓沓仔回流，業者有期待嘛愛做好防疫準備，餐廳內底有隔枋佮梅花座，就是驚降級了後，民眾做伙出遊人kheh人，高雄市觀光局佮電信業者合作，佇駁二、愛河、旗津等等七个戶外景點，建置人流警示燈系統。

高雄市觀光局主任祕書 陳依芳:「若是出現紅燈，表示容流人數已經超過，現場會進行管制，建議民眾假日出遊前會當查詢這个系統。」

民眾透過網路，抑是手機仔，就會當看著七个景點的燈號，當作出遊的參考。