新竹義民祭縮減規模舉辦 配合防疫.線頂轉播
發布時間：
更新時間：
逐年的舊曆7/20是客家族群的重要祭典─義民祭。今年受著疫情影響，義民廟宣佈義民祭照常舉行，毋過會分流、規模也縮小，另外增加線頂轉播。若講著豬公比賽，是予聯庄家己做決定敢欲參加。
一年一擺的義民祭，是客家族群上重要的祭典之一，逐年攏有來自全台廟寺上千个信眾，轉來到新竹縣義民廟參加，今年受疫情影響，主辦單位宣布，會依照中央規定，配合防疫措施來舉行。
新埔義民廟董事長 林光華:「一方面全台的香旗轉後頭，阮會分做幾工分流轉來祭拜，而且因為遊覽車愛坐梅花座，阮相信逐家攏會遵守規定。」
義民祭當日原本會提供糖糜佮平安點心，這改嘛決定取消，神豬比賽的部分，雖然予聯庄家己決定，毋過規模嘛比過去減誠濟。
新埔義民廟董事長 林光華:「到8月初九有進一步的開放，抑是閣收轉去，又閣三級抑四級這種情況，阮會看狀況依照法令來辦理。」
另外新竹城隍廟，6月就已經宣布，考量著參加人數，今年的城隍出巡以及相關法會全部取消。
