新竹水庫添37萬噸 只通用2工半.水情猶原食力 | 公視新聞網 PNN

新竹水庫添37萬噸 只通用2工半.水情猶原食力

北部地區前兩工仔有落雨。新竹寶山水庫、寶二水庫的集水區,落雨有落9毫米,大約有37萬噸的水入去水庫,毋過逐工的出水量就17萬噸,對6月起開始的限水措施,幫助是誠有限。

24的一場大雨,對北台灣水庫的水情有小可仔幫助。根據經濟部水利署25的統計,這兩工全台灣水庫有1,611萬噸水的入數,其中新竹寶一佮寶二水庫累積降雨量9毫米,增加37萬噸水,大概是新竹地區2工半的用水。
 
北區水資源局副局長郭耀程:「包括石門水庫降雨量有22毫米,入水量估計增加有420萬,新竹地區寶山佮寶二水庫系統的部份,嘛估計會使增加37萬噸的入水量,這對新竹佮桃園地區攏有正面的幫助。」

雖然講有落雨,猶毋過新竹的水情仝款食力,目前已經按算對6月份開始,進行限水措施,民眾佮飯店業者嘛攏做好停水的準備。
 
民眾:「備用的水桶來囤水,避免停水的時陣,無水通好用。」
飯店業者:「六月初一開始,若是開始供5停2,飯店會開始定時監控用水量,嘛會提早囤水備用,並且阮已經接接買水來做備用。」

水利署統計目前寶山水庫的囤水率已經落到6.7%、寶二水庫閣較低,干焦賰3.4%,希望未來28.29這幾工的落雨會使有較好的結果。

相關新聞

留言區