新正買刮刮樂試手氣 嘉義圓環彩券行生理旺

過年時仔，逐家攏會買彩券來試看今年字運，尤其嘉義市的圓環上鬧熱，因為附近銀行濟，民眾寄望會當相傍福氣，成做嘉義市過年的特殊光景。

每一个人攏專心咧刮（kueh）家己的彩券，圍爐過後，有誠濟人來到嘉義市圓環附近的銀行買彩券試手勢。毋但在地人，閣有外縣市的人聽人介紹，專工來體驗。


嘉義市過年這站仔，日時加減會落一寡仔雨，但是文化路的夜市仝款是人滿四山，佇文化路排擔的店頭就講，因為疫情的關係，生意猶無舊年遐爾好。

猶毋過佇仝一區，賣彩券的頭家就講，過年時仔，逐家攏想欲試手氣，所以對二九暝到初五這段時間，來買彩券人是愈晏愈濟。

賣彩券的頭家講，過去這搭只有一兩擔咧排，毋知是底時開始，人變甲愈來愈濟，可能是因為倚銀行，民眾感覺會帶財，所以這馬煞成做過年時才會出現的特殊光景。