過年買花轉厝添喜氣 鼓吹花.焦躁花上濟人交關

真濟人最近趕欲上花市，想欲買一寡仔花囥佇厝裡過年。臺北內湖的花市嘛是人客插插插，有店家表示，這幾工的生理是加真好。

內湖花市四箍圍仔，過年前熱鬧刺刺，警察無閒咧做交通管制。花市內底揀花、買花的人閣較是袂少，欲倚過年矣，真濟民眾真佮意花的香味佮喜氣。

頭家講，這站仔逐家較會注文的，就是菊花、百合等等，色水較大範的，有招財意義的花也誠搶市。花市內底除了買鮮花，焦燥花也誠濟人去交關。

頭家講，這馬有誠濟長輩會買進口包裝好勢的鮮花轉去拜拜，算是一種傳統形態的改變。另外，大年初三是西洋情人節，粉粉紅紅的花蕊嘛真受歡迎。觀察花市內底，毋但有歲的序大愛來，嘛有袂少少年人來踅，花市這爿一直至二九攏是24點鐘營業，有需求的民眾會當參考。