視察天駒部隊 蔡英文赴澎湖勉勵空軍官兵

最近中國軍機一直來擾亂，甚至閣飛過海峽中線。總統蔡英文今仔日就親身去澎湖視察這陣守佇上頭前的空軍「天駒部隊」。蔡英文以三軍統帥的身分表示：對國軍有信心，也不准任何人來咱的領空耀武揚威。


臺灣IDF 經國號戰機，佇空中進行例行性演習，欲替國人看顧臺灣西部海空安全。面對最近中國解放軍派軍機se來臺灣，蔡總統今仔日行跤到去澎湖馬公基地，視察守佇咱空防第一線的空軍「天駒部隊」。

蔡總統是閣以三軍統帥的身分，表示對天駒部隊守護臺灣領空安全，真有信心。

中秋時到日到，蔡總統也特別發加菜金，答謝國軍兄弟姐妹的打拚，官兵也送一領IDF空軍飛行夾克予蔡總統，感謝總統視察，也強調會繼續守護台灣安全。