彰化和美美髮師今年八十外 好手藝傳一甲子

彰化和美有一位專門替人梳日本頭的阿嬤,今年85歲矣,伊講伊是佇日本學的,伊的新婦和孫新婦也傳承伊的好功夫。

共頭毛捋予整齊,沓沓仔抾,今年八十五歲的尤謝阿市喙笑目笑,猶閣踮彰化和美鎮開頭毛店,替人客捋日本頭。來遮予伊做造型的老主顧講:尤謝阿市的功夫,無人有法度和伊比並。

尤謝阿市講伊做美容院這途,替人洗頭、捋頭鬃已經超過一甲子矣,不管新娘頭、日本頭、或者是其他造型,伊的手就親像有魔法,總是替人妝甲妖嬌美麗,伊的新婦和孫新婦也攏有學著伊的功夫。

開佇彰化和美鎮這間已經幾十年的老店,雖然看起來傳統,不過尤謝阿市和伊教出來序細,手路幼閣綴會著時代,予來做造型的人客,對阿妹仔、小姐、阿姨到阿媽,逐个就攏歡喜滿意。