屏東九如的昌榮社區關懷據點，因為張文筆阿公捌學過宋江陣，招這寡老大人組成「老人宋江陣」，表演起來毋但真認真，嘛予生活更加趣味。
攑頭旗、弄雙斧，團員的動作有力閣猛扭，氣勢袂輸予專業的宋江陣。
若是講著宋江陣，大部分的人攏會想到是一陣少年家，組成的陣頭，毋過屏東九如有一个隊伍很特別，斟酌共看，成員攏是一寡老大人。九如昌榮社區關懷據點，過去只是tshuā老大人做伙跳健康操振動身體，但是因為其中有一位張文筆阿公捌學過宋江陣，所以就想到招老大人做伙來組一團宋江陣，成員上濟歲的已經九十歲矣。
九如昌榮社區關懷據點，替長輩規劃誠濟課程，這團宋江陣毋但予老大人會當加活動，而且因為別的社區邀請īn去表演，老大人就閣較歡喜，逐家攏練甲足認真。毋但安呢，阿公阿媽閣家己用無愛ti̍h的物件親像是鍋蓋、柴的耙子，做成表演欲用的兵器，提起來較輕較好使用。
負責教的張文筆阿公，看團員攏練甲真歡喜，伊嘛教甲足有成就感，希望利用逐禮拜日的練習時間，予老大人出門活動、毋但有目標欲學新的物件， 嘛會當加做運動，嘻嘻譁譁健康快樂過日子。