高雄市小港區早起有居民佇中林路附近鼻著誠重的化學酸氣，愈鼻愈無爽快，環保局稽查發現，這个酸氣是因為中石化小港廠有設備故障咧檢修，過程中無做好預防措施，造成硫酸氣體走出來，環保局講，會依法對中石化裁處，上懸會當罰五百萬。
8/22早起六點外，高雄小港的中林路遮，誠濟上班騎車經過的民眾，攏有鼻著一陣誠重的化學酸氣，因為揣無酸氣對佗位來的，愈鼻愈無爽快，毋但有民眾敲電話通報1999，嘛有人向里長來反映，講這酸氣無蓋正常，毋但誠鑿鼻，目睭也誠甘苦。
附近居民:「感覺有淡薄仔眩眩，然後就是身軀會有誠明顯的彼種無爽快，毋是一般的彼種瓦斯的味，就是鼻了 會足鑿鼻完全鼻袂落去」
高市小港區鳳森里長 陳信雄:「環保局的人有來監測，發現是中石化佇漏酸氣有隨請in做檢查，發現著就隨做處理矣」
環保局接著通報就隨去稽查酸氣的來源，一路巡來到中石化小港廠，發現廠區的硫酸製程設備因為損害當咧檢修，酸氣都是對遮來的。中石化表示，液態的硫磺接觸著空氣都會結晶，現場的量大概三四公斤，應該無可能造成遮重的酸氣。毋過環保局認定，酸氣是因為業者無做好預防措施才走味出來的，因此會依法裁罰。
高市環保局環境稽查科長 王健州:「硫酸鑿鼻酸氣走出來，已經違反空汙法32條規定，除裁處十萬到五百萬箍的罰鍰以外，也有要求愛隨改善」
中石化小港廠工安組副理 龔皇誌:「環保局所開的罰單，阮會針對伊所列的一寡仔違規事項，阮中石化小港廠會進行相關的陳述意見」
三月份中石化就捌因為設備無正常運作，衝出柑仔色的煙，去予環保局罰，這馬閣造成化學酸氣走出來，當地里長講，毋但中石化，伊向望所有的工廠攏會當做好管理，莫予in活佇驚惶內底。
（新聞標題、導言、內文為台語文）