台電員工李元瀚因為搶修電力去予高壓電著，鬥葉克膜搶救一禮拜無效，家屬今日（7/22）決定放棄急救，也共目睭的角膜捐出來。下晡，李元翰的大體佇眾人參台電工程車的護送之下，轉來到嘉義的厝佮台電配電中心，向伊的親人和同事告別，逐家也攏感謝伊辛苦的付出。（新聞標題、導言及內文皆為台語文）
台電的工程車做前， tshuā領載著台電員工李元瀚大體的車輛，一路對台南轉來到嘉義市的厝，最後閣來到伊上班的所在，台電嘉義區處的配電中心，佮做伙拍拚九年的同事告別。現場一、兩百位的台電員工是那等目屎那輾，強忍悲傷，迎接李元瀚轉來，也感謝伊的辛苦付出。
台電配電中心員工：「（元瀚）已經轉來厝裡，全體同仁，向元瀚行禮。」
台電配電中心員工：「浩克，工作結束，順行。」
浩克是同事替李元瀚號的偏名，漢草好、個性好鬥陣，來嘉義區處服務九年矣，已經娶某生囝的李元瀚有兩个查某囝，無論是家庭上抑是工課上，李元瀚的表現攏誠受肯定，這擺因為風颱搶修發生意外不幸往生，台電董事長表示，針對意外發生的原因，雖罔台電內部有啟動調查，毋過因為勞檢單位嘛有佇查，因此怹會尊重後續的調查結果。
台電董事長 曾文生：「阮一定會好好仔來檢討，看阮欲按怎，來做好閣較濟工安防護的相關工課，也予咱台電的同仁，會當有閣較好的勞動條件佮安全保障。」
手機仔內底這張相片，是李元瀚傳予爸爸的最後身影。李元瀚因為風颱搶修去予高壓電電著，鬥葉克膜搶救一禮拜無效了後，家屬7/22忍疼決定欲放棄搶救，同時捐出角膜。
李元瀚父親：「有幸，阮猶閣會當選擇予伊，保有最後的光榮佮尊嚴。」
佇咧人生的最後一程，李元瀚仝款用著無私奉獻的精神，予這份愛佇社會延續落去。
記者 林緯廷 李晨宇 許嘉茹 邱紹揚 綜合報導