苗栗白沙屯拱天宮媽祖進香，今仔（5/1）暗時11點25起駕，欲去到北港朝天宮進香，按算36點鐘到北港，佇5/11回宮。今年報名人數有33萬人，創歷史新懸。盈暗8點，總統賴清德也會到現場參香。（新聞標題、導言及內文皆為台語文）
白沙屯拱天宮廟埕外口四箍圍仔的大細條路是挨挨陣陣，今仔5/1下暗乙巳年白沙屯媽祖就欲起駕到北港進香，濟濟香燈跤早早就先來準備，沿路有熱情的店家、民眾咧分點心，因為進香路途遠，有連紲參加四冬的香燈跤特別來領五指襪仔，希望路途一切順序。
香燈跤：「因為阮欲綴媽祖行，阮若欲行全程，這是保護阮的跤，會使予阮閣較有力。」
香燈跤：「行前兩日佮上尾兩日，跤較袂磨破、較袂膨疱。阮嘛是來分結緣品的。」
除了香燈跤也有志工十冬前就參加，這兩冬因為著癌症無法度參與，伊有向媽祖下願，今年身體順利恢復了後來還願，今仔（5/1拜四）早起特別對嘉義騎機車來鬥相共。
志工 曾芳玉：「我感覺是媽祖婆共我保庇，予彼粒瘤走出來，所以我手術真順利，也咧復原當中，所以來還願、來做志工。」
今年白沙屯媽祖進香會行10工9暝，大約有33萬个香燈跤參與，五月初一登轎起駕，初三到北港，十一回宮，36點鐘就愛行到北港，廟方表示，這改報名人數增加欲8成，疏文超過1900張。
苗栗白沙屯拱天宮總幹事 陳春發：「咱每年白沙屯的特色，就是咱去到北港khat火。咱有上疏文，上疏文就是咱報名的人，逐个（名）攏寫佇疏文內底。攏總有，咱的疏文有1920張。」
廟方表示，因為天氣誠熱，香燈跤一定注意莫著痧。抑若下暗11點25白沙屯媽祖會登轎起駕，到時陣總統賴清德、台中市長盧秀燕、雲林縣長張麗善會到現場參香，同齊展現臺灣人對媽祖虔誠信仰的熱情。
記者 張佳倪 謝季潾 苗栗報導