高雄市有車主因為汽車大牌去hőng偷提去，毋過車主佇車牌貼一張紙，頂懸寫車牌拍毋去、已經報警，請大家同情，就按呢共車駛上路，有民眾看著感覺趣味，猶毋過警方講，車輛無掛牌就佇車路咧駛，按呢是違法矣，上懸會當罰18000箍。（此則新聞標題、內文為臺語文。）
高雄市有車主因為汽車大牌去予偷提去，毋過車主佇車牌貼一張紙，頂懸寫車牌拍毋去、已經報警，請大家同情，就按呢共車駛上路，有民眾看著感覺趣味，猶毋過警方講，車輛無掛牌就佇車路咧駛，按呢是違法矣，上懸會當罰一萬空八百箍。
民眾騎oo-tóo-bái佮一台車相閃身，伊感覺奇怪共斟酌看，這台車的車牌哪會是一張紙矣，頂懸閣寫講，伊的車牌予偷提去，已經通報，請逐家同情，民眾將這畫面囥去網路剾洗車主，講不如掛假牌，毋過無論是用紙貼矣，猶是掛假牌，警方表示，只要無掛正常的車牌，就駛上車路，攏是違法。
高雄市過埤派出所長 馬百駿表示：「道路交通管理處罰條例第12條規定，處罰汽車所有人3千6百箍以上，1萬空8百箍以下的罰鍰。」
雖罔有民眾講，車主若是有紮車牌著賊偷的報案單，萬不二予警察閘落來，可能會當通融，毋過這毋是正範，警方表示，車主報案了後，愛先去監理所申請臨時牌照佮行照，這台車才會當駛上路，若是無臨時牌照，都干焦會當倩人拖車去監理所驗車，重領新牌。
高雄區監理所車輛管理科長 凌竟銘講：「規定是講你若無牌欲駛上路，就是愛請臨時牌照，抑是用別台車去共拖，來咱遮（監理所）做驗車的動作，當然警方有in舉發裁決的一个標準。」
代辦業者則表示：「牌照稅一工41箍，燃料稅若像22箍抑是21箍，猶閣有保險一定愛開，行照佮兩塊臨時牌照基本消費是350箍，所以三工加起來，若用1.8的來算大概愛三工（愛六七百箍無）差不多。」
監理所強調，民眾若是有車牌著賊偷、拍無去等等的問題，猶是愛先申請臨時牌照，才駛去監理所驗車、重領牌，千萬毋通親像這位車主，無牌照駛上路，可能閣加收一張紅單。