24節氣的驚蟄，對這工開始，蟲豸、鳥仔類攏活動起來。台電嘛開始調動超過4000个人員，協助清理電火柱、電線頂的鳥仔岫，也檢查線路設備，希望降低因為動物去動著線路造成停電的機會。（新聞標題、導言及內文皆為臺語文）
台電人員peh起去樹仔頂修剪樹枝，處理電火柱仔頂面的鳥仔岫，目的是為著避免鳥仔、蟲豸、蛇抑是鳥鼠磕著電線，造成跳電、失電的事故。
台電北南區處線路課課長 楊肅聯：「像這客鳥仔，正常伊是攏咬樹枝來做岫；像講工地內底有鐵線，伊嘛會共伊咬來做岫。但是鐵線攏是會過電，伊佇阮柱仔頂、內底做岫，伊就有可能去拄著阮線路的設備，去拄著（就會）相拍電。」
3月初5、拜三這工，台電出動超過4000个工作人員，投入線路設備檢測的工課，啟動「全國強化穩定供電」行動，因為拜三是24節氣的驚蟄（kenn-ti̍t）。
氣象署科長 劉宇其：「以驚蟄來講，伊主要講的就是，拄出現雷雨、陣雨的現象，可能會驚著咧睏冬的動物。」
台電表示，鳥仔、蟲豸磕著電線，造成跳電、停電的比例，占四成遐爾懸，尤其逐年的3月份、4月份，這款情形上捷發生，干焦舊年3月─4月份就有232件，是仝年1月、2月份的三倍以上。
台電北南區處線路課課長 楊肅聯：「針對這个24節氣內底的驚蟄，阮有特別做一个宣示的活動，就是講欲來加強，防止鳥仔、動物去磕著（電線）的工課。」
台電表示，目前佇1月─2月份，佇全國已經有拆除1200个佇電力設施頂面的鳥仔岫，過程中若有發現鳥仔囝，會共怹交予動保單位，抑是動物園去處理，袂去傷害著鳥仔，也希望透過這改的活動，確保供電的穩定，予民眾用電閣較安全、閣較放心。
記者 鄭亞宣 許猛捷 臺北報導