財政部公布2021年度綜合所得稅的結算結果，新竹市東區的關新里，平均所得相連紲四冬排全台灣上懸、有374.7萬。抑若以縣市來分，新竹市平均所得152萬，仝款是全台第一名，隔壁的新竹縣，平均所得是139.5萬，頭擺超過台北市、提著第2名。(這則新聞標題、前言、內文為臺語文。)
來到全台所得上懸的新竹市關新里，看著一棟一棟新起的大樓，附近毋但生活機能好，閣有公園會當散步運動，而且遮離新竹科學園區，只需要10分鐘的車程。
新竹市關新里里長黃雅卿講：「蹛遮攏是佇園區食頭路的人，疫情期間其實各行各業大部份攏無好的，科技業顛倒逆勢夯起來，佇園區上班族的薪水，顛倒是逆向成長而且是成長誠濟。」
根據財政部所公布舊年所得稅結果，蹛佇遮的人平均所得374.7萬，而且已經連續四冬全台上好野，若是以各縣市來比，新竹市平均152萬仝款全台第一，新竹縣以139.5萬，頭一擺超過台北市。
竹北市斗崙里長張婉媃講：「遮嘛是以外來的人口較濟，遮的居民大部份攏是佇科學園區上班。」
新竹縣寶山鄉長邱振瑋也表示：「最近幾年台積電佇寶山鄉，徵收140公頃欲起2奈米參3奈米工廠，嘛予寶山鄉發展了真緊。」
雖罔平均所得是全台第一，毋過關新里的厝價嘛是無俗，舊年的厝價已經比前一年、閣起欲3成，目前平均一坪已經欲倚50萬。