台鐵和旅行社合作，推出兩鐵列車，火車頂頭有裝腳踏車的車架，予旅客會當共鐵馬牽起去火車，毋過這个活動是用已經有40年歷史的莒光號改的，外界也煩惱安全的問題。台鐵強調，列車有經過三級檢修，安全無問題。
紮家己的鐵馬上火車，閣有專門的車架會使囥。臺鐵十四開記者會，宣佈佮旅遊業者合作，重新整理原有的莒光號列車，推出兩鐵旅遊列車，閣有按照民眾無仝的體能設計的旅遊行程。
鐵馬車友 陳先生表示：「以前若是愛紮家己的鐵馬參加騎鐵馬的活動，我愛共車攏拆拆咧，囥佇車袋仔內底，閣愛另外拆一張票。」
鐵馬車友 汪先生表示：「無像過去干焦會使坐區間車，區間車嘛有固定車廂，鐵馬的車位無遐爾濟，嘛無固定的車架。」
旅遊業者 黃信川表示：「列車行到佗位騎到佗位，仝時間結合在地社區，在地小農、在地新創，聯合共觀光做起來。」
毋過嘛有人認為，車站、列車的設計看起來舊漚舊臭，無欲出門觀光的活潑氣氛。而且中秋連假臺鐵員林、花壇之間號誌系統各樣，造成嚴重慢分；13平溪線嘛因為土石崩塌停駛，兩鐵旅遊列車安全性也受著質疑。
交通部臺鐵局副局長 朱來順表示：「這个車是經過三檢，三檢就是大修的程度過，雖然伊是舊車，但是安全性是無煩惱的。」
臺鐵對列車安全性掛保障，嘛講若是未來設備有需要提升，會閣再做了解。另外針對邊坡的安全性，已經成立專案咧處理。14下晡交通部長王國材也會到花蓮，視察平交道的安全系統。