相連紲落大雨各地攏傳出災情，新竹縣寶山鄉傳出大水雨造成車路崩陷的災情，目前當地上無有四戶人家厝無水無電、無法度出入。
民眾出入的道路，這馬因為大雨落袂停變做這款模樣，毋但車輛無法度通行，就算想欲步輦通過嘛著真細膩，大面積的崩陷，長度差不多有20到30公尺。
當地住戶表示：「本來是小條的必痕，閣來崩陷到這馬，莫講車輛，連人員就無法度行。若是繼續閣崩落去，紲落來就是人命的問題」
當地議員表示，目前了解有4戶人家厝受影響，民眾厝內嘛無水無電，為著安全已經請民眾暫時徙去別位安置。
新竹縣議員 邱振瑋指出：「規个大水沖落來，因為塗壤飽和，包括門口埕攏對下跤沉落去，閣對外口趨振動，繼續落去會影響著人家厝的安全」
鄉公所表示目前因為大雨落袂停，暫時無法度修復，干焦會當臨時先用布帆來崁，減少地基流失，等雨水擋恬，才會當用鋼條固定進行修復。