新竹北埔逐年新正的十五暝， 攏會有成千人攑火把，經過老街，一路行對山頂去，遠遠看去若像一尾火龍仝款，這就是北埔真有名，油笐火的活動，象徵會當消災厄、守護北埔，有真重要的意義。
精彩的表演予現場的氣氛愈來愈鬧熱，一年一度的北埔正月十五油笐火活動開始。自北埔慈天宮內提出火種，來到舞台頂懸才閣再分火，傳予參加的民眾，共原本暗眠摸的老街點佮光爍爍，親像一尾火龍。
民眾：「囡仔真有興趣，所以阮就報名參加，(敢是第一擺參加)，著 是第一擺。」
小朋友：「活動非常趣味。」
小朋友：「阮感覺真新奇。」
在地鄉親相信，只要正月十五暗時，攑火把上山頂拜神，就會使消災，予北埔來年有好的運勢。
北埔鄉長 莊明增表示：「日本時代北埔有兩改抗日事件，當時政府為著減弱在地勢力，所以佇信仰中心慈天宮後壁，開一條路來斬斷龍脈，後來佇地方人士指點之下，用火龍的方式共龍脈接轉來。」
火龍總共分6條路線，逐家一路開講一路共手中的火把攑懸懸，予暗時的北埔老街，看起來是有夠鬧熱。