高雄茄萣溼地，入秋過後發現真濟罕見的渡鳥來臺灣過冬，也因為環境適合，渡鳥才會來，其中也有誠特殊的草鷺。
拄才食著魚仔的紫鷺，開始佇草埔仔行來行去，紫鷺毋但有真長的頷頸，翼股是紫灰色，嘛叫草鷺抑是花窪子，伊是對俄羅斯飛來的渡鳥，佇南部真罕見，最近煞出現佇茄萣溼地，疼惜鳥仔的人士攏真歡喜。
鳥友，邱明德表示：「較早看攏兩三隻爾爾。我發見是五隻，伊是一个家族，伊攏會分家己的地盤，討食、掠魚仔。」
毋但逐工攏會看著紫鷺佇草埔仔𨑨𨑨，遮嘛發現彩䴉，伊是全世界罕見的鳥仔，茄定溼地頭一擺記錄，因為愈來愈濟渡鳥出現，這馬逐工攏有真濟人專工來翕鳥仔。
茄定區觀光發展協會理事長，郭淑娥表示：「水非常充沛，草原嘛足媠，所以吸引一寡稀有的鳥仔來，比如講像紫鷺，這嘛是阮今年記錄著，閣來就是這兩工記錄著彩䴉。」
入秋過後就是看渡鳥的季節，永安溼地頂月底嘛出現三隻烏面抐桮，舊年佇茄萣佮永安，攏總出現四百隻烏面抐桮，數量是新的紀錄，看著遮爾濟渡鳥陸續報到，疼惜鳥仔的人士期待，今年數量會閣較濟。