根據英國衛生署上新報告，英國到6月初為止，穢著印度變種病毒的人數是3萬3千外人，毋過死亡率煞干焦0.1%左右，佇英國有開業資格的醫師認為，這是因為當地疫苗注射率超過6成，臺灣著愛趕緊注疫苗，才會當阻擋印度變種病毒繼續湠開。
印度變種病毒Delta予全球新冠疫情，帶來新的威脅，根據英國公共衛生署6月11公佈的變異株數據報告，穢著Delta死亡人數42人，不過佇今年2月到6月初7，總穢病人數有3萬3206人，致死率0.1%左右，比全球平均致死率2.1％閣較低。英國註冊醫師葉庭瑜表示，這是因為英國疫苗涵蓋率已經達到六七成。
英國註冊醫師葉庭瑜:「一筒的BNT已經有九十幾趴，兩筒疫苗注落去，不管伊是佗一種个疫苗，伊防止蹛院的保護力，攏會當達到百分之九十二 九十六，攏非常好。」
因為印度變種病毒Delta，傳染力比英國變種病毒湠60%，醫師表示擴大熱區篩檢誠重要，第一線邊境和防疫人員也著趕緊注第二筒疫苗。
英國註冊醫師葉庭瑜:「佇南部伊有一寡熱區，可能必須愛做一寡佈局，另外邊境檢疫以及照顧邊境移入個案的醫護人員，in的第二筒是袂當等的。」
陳時中:「阮這馬當咧積極圍堵，所以阮會擴大箍列相關不管是有接觸往來的人，不管是對職業別來看，對移工或者是非法移工，這類的跤跡阮攏會去調查。」因應Delta變種病毒入侵社區，陳時中表示針對密切接觸者的定義，只要超過10分鐘就會箍列，社交距離的規範敢會變嚴格，會閣再和專家小組來討論，望阻止擴散。