彰化蚶仔大盤接手家業 穩定供貨.拓展銷路

彰化伸港的曾煌明先生，因為厝內拄著臨急的變化，伊著愛家內事業的擔頭擔起來，接手老爸經營的蚶仔大盤，一來伊和小弟相分偏，無嫌工課濟，二來也落南揣貨主，順紲拍開通路，接班後也進行改革，予家後鬥協助銷蚶仔，也因為蚶仔，感情變閣較好


共窟仔底的蚶仔掠起來貯做一籠，紲落去佮規籠的蚶仔攏吊起去岸頂，用機器共洗予清氣，準備包裝、出貨。這是彰化伸港的大盤曾煌明，逐日攏著發落的工課。這嘛是伊對老爸手頭接落來的穡頭。

曾煌明講，當初時因為發生意外，毋甘老爸拍拚濟年的心血烏有去，不得已只好提早接手厝裡的事業。啊伊的小弟曾瑞源就負責飼蚶仔，毋過最近in煞拄著一个問題。

這幾年因為捷發生蚶仔雄雄死去的情形，曾煌明為著穩定貨源， tsua̋n落南到王功、雲林遐收蚶仔。所以攏是天猶未光，就愛到窟仔確認收貨的品質。而且伊猶閣和餐廳、菜市仔的販仔合作，針對人客的要求做客製化的處理。

曾煌明拍拚拓展貨源，改變頂一沿的出貨模式，毋但和小弟分工合作，閣有家後鬥巡頭看尾，規家伙仔同齊做蚶仔的生理，因為這嘛是老爸留予in上蓋珍貴的記持。

記者 綜合報導