此網頁已閒置超過5分鐘，請點透明黑底或右上×按鈕繼續閱讀
九合一大選賰12工，各種民調也攏公開。根據自由時報的上新民調，臺北市長選戰三跤㧣，民進黨陳時中的支持度上懸。對這份民調，陳時中佮蔣萬安攏講，市政才是上重要的，會繼續拚支持度；無黨籍黃珊珊煞認為，大部份的民調攏袂使相信。
無黨籍臺北市長參選人黃珊珊今仔日發表伊的長照政見，強調重陽敬老金未來一定會繼續發。國民黨參選人蔣萬安是公佈伊的競選官網佮募款物仔，嘛呼籲民進黨參選人陳時中，愛針對賴清德講臺北市是疫情的開端，講清楚伊的立場。陳時中回應，伊絕對無歧視臺北，疫情會煏是對中國武漢來的。
臺北市長無黨籍參選人黃珊珊喝講，欲共第一殯儀館拆掉，變公園綠地，引起眾人議論。陳時中認為，這是柯文哲進前的計畫。蔣萬安也講，第一殯儀館欲拆已經是欲做的政策，未來應該愛多元規畫、尊重在地。臺北市政府目前已經編預算，送到議會審查，殯葬管理處表示，二殯二期整建工程，按算2023年年中完工，一殯相關的拆除計畫，會佇明年10月過後進行。
來關心臺北市長的選戰。民進黨臺北市長參選人陳時中，喝講會趕緊處理海砂厝、危險建築，4年內欲核定2成，8年核定5成；臺北市副市長黃珊珊，是向望20年內換掉5千棟老公寓；抑若國民黨蔣萬安，昨昏也提出公辦都更的3項策略。
