臺南真善美戲院8/1關門 濟濟民眾喝毋甘

戲院外口濟濟人排隊欲買票，準備通入去看電影，來的人並往過加真濟，嘛有人參戲院翕相做紀念，民眾攏是聽著戲院欲停業消息，用實際的行動來表達支持。2018年開幕的真善美戲院已經經營六冬，業者初一佇面冊雄雄鋪文，公告八月初一欲停止營業。附近業者講，進前遮真熱鬧，這陣來遮的人參往過比，賰兩成。

附近業者侯先生，「這馬干焦賰樓跤佮地下室有咧營業，閣有二樓電影院有咧營業，樓頂攏總無矣啦，(是按怎變甲稀微)，就無人咧出入閣歹停車。」

民眾林小姐，「欲結束營業感覺非常可惜，因為毋知影以後，欲去佗位看這非主流的電影。」

臺南真善美戲院這个點，是日本時代真出名「宮古座」戲院的舊址，戰後改名做延平戲院繼續經營。早前遮嘛捌成做商業大樓。2015年有業者開1.2億重新整修，六冬前真善美戲院進駐，是台南頭一間藝術電影院，猶毋過受著前幾冬疫情影響，閣加上串流媒體這陣當興，致使實體電影院面對營運的壓力，戲院經理指出，捌有一工無到十个人客來。

台南真善美戲院經理廖介山，「打造成較溫馨的感覺，事實上阮初期真正有做著，原因因為中間拄著疫情，其實疫情對營運上有誠大的影響。」

臺南市長黃偉哲，「阮嘛感覺非常可惜，但是我希望代誌敢閣有參詳的空間，嘛是希望市民朋友加去真善美看電影。」

目前臺南攏總有13間戲院，毋但真善美戲院，播放二輪片的全美戲院嘛仝款真歹經營。文化局指出，in當咧規劃整合臺南圖書館、文化中心等所在的播放機制，通繼續提供予民眾觀賞藝文電影的管道。