臺博館做「康熙臺灣輿圖」動畫 紹介文史風貌

「雞籠積雪、獅球嶼、閣有臺北大湖、敢真正存在過？」斟酌看「康熙臺灣輿圖」的研究人員，雄雄落入圖內的世界，到300年前的台灣。

「裨海紀遊有寫講，船進入干豆仔門了後，河水會雄雄變足闊的，看無水尾佇佗位，彼个就是臺北大湖。」

康熙臺灣輿圖紀錄台灣西部、自北到南的地形、生活景觀。自2020年開始，國立台灣博物館以3D動畫，紹介這幅圖，今年閣揣台灣歌仔戲演員陳亞蘭、演員莊凱勛、導演葉天倫全台語配音，推出第二齣動畫「北臺紀遊」。

國立臺灣博物館館長洪世佑說明，「臺灣八景內底有雞籠積雪，閣有彼陣傳說中的臺北大湖，希望將當時的場面恢復起來。」

民眾講，「感覺表現了真，以前咱毋知的所在，感覺講囡仔可能較好了解。」

指頭仔摸咧，就通透過螢幕、知影康熙臺灣輿圖當中的詳細內容，台博館內的這个裝置，運用科技協助民眾了解台博館的研究成果。台博館表示，透過好理解的手法予民眾吸收智識，是這幾年來的重要工課。

國立臺灣博物館館長洪世佑強調，「以前的博物館是踮咧遮，等民眾來接近，但是阮這馬博物館的理念，阮會用各種的方式來吸引觀眾」

台博館表示，in也當咧收集館內文物、建立線頂的虛擬博物館，推廣予數位時代的少年人。In發見透過濟種手法推sak文物，今年到今已經超過80萬人來踅台博館，創下歷史新懸，確實予民眾較願意來博物館行踏。