高雄邀請傳統戲團去學校表演 釘根母語文化

劇團團員手勢老練，將布袋戲尪仔弄甲誠活潑，演出「我是英雄」這段戲劇，金鷹閣電影木偶劇團來到翠屏國小表演，台跤的學生囡仔看了是那笑那拍噗仔，攏感覺誠趣味。

高雄市楠梓區翠屏國小學生 郭庭妤：「佮我佇電視頂懸看著的無仝款。」

高雄市楠梓區翠屏國小學生 林柏叡：「我聽著一寡聽有的臺語，就知影咧講啥物。」

高雄市楠梓區翠屏國小校長 黃景良：「學校希望講臺語推廣的語言，佮文化一直推廣下去。」

囡仔毋但佮意布袋戲尪仔，遮的小朋友閣會當穿歌仔戲的衫褲，綴演員的動作學搬歌仔戲，高雄市尚和歌仔戲是將童話故事加入歌仔戲的元素，設計遊戲，嘛予小朋友佇台頂用台語表演，做歌仔戲演員佮逐家互動，透過表演學生會當學習台語口白佮詞彙，這攏是課本學袂著的智識。

高雄市尚和歌仔戲劇團演員 蔡馨慧：「有一寡囡仔打扮做小旦，阮會用簡單的方式，予囡仔用簡單的自我紹介來講兩句臺語，現場學。」

高雄市政府文化局副局長 簡美玲：「囡仔經過傳統戲曲的欣賞，毋但會當欣賞節目的好，嘛會當學臺語。」

高雄市文化局舉辦藝術體驗教育活動，因為疫情停辦3冬，今年總算閣開始安排劇團去校園演予偏鄉學生看，今年有七个劇團，攏總演出24場，向望透過藝術體驗教育計畫，毋但予學生認捌傳統戲曲，也會當予母語釘根。