「杜蘇芮」咧欲來 緊攢避難包、巡門窗提高警覺
郭柏均 張育睿／台北報導
發布時間：
更新時間：
目次
中度風颱杜蘇芮拜三四仔上接近臺灣，臺灣已經幾若年無風颱矣，就驚民眾無咧要意。提醒民眾風颱來進前，愛參里長聯絡，愛保持警戒、疊沙包、用電火布貼好窗仔等這寡防颱準備。（此則新聞標題、導言、內文皆為臺語文。）
風咻咻叫，加上雨水，人強欲徛袂牢。這改的風颱杜蘇芮，強度倚近強烈風颱，民眾預防風颱的準備，袂始放冗。
體驗民眾蔡小姐：我有一點仔毋知按怎應付，彼个雨攏灌入來我的雨衫內底矣，我感覺真恐怖。
臺北市消防局防災科學教育館館長詹前洋：因為阮以前來看，有人看無啥雨，騎oo-tóo-bái欲去買食的，結果一陣風、一陣大風吹來，就跋倒矣、就受傷矣。
臺灣已經幾若年無風颱矣，就驚民眾對風颱較無要意，各地的消防局，攏有做防災手冊，臺北市防災科學教育館表示，in也參里長、區公所聯絡，愛民眾保持警戒，做好防範措施。親像緊急避難包，也愛定期檢查。
臺北市消防局防災科學教育館館長詹前洋﹔較保暖的衫、猶有巾仔，閣有一寡生活用品，譬如講手電仔、收音機，較會袂記的就是這个水、食物是有保存期限的，定定欲用的時陣，已經過期矣，嘛袂使食矣，所以定期、半年一年攏愛去檢查一改。
防災館也提醒，為著防範大風，窗仔門就愛貼電火布，若較舊的建築，窗仔門無遐密，就愛加木板固定。民眾若有需求，也會當參當地區公所聯絡，領沙袋仔、疊佇gâu淹水的所在，防範災情。
熊楚瑜/編輯
