彰化推廣「女路導覽」 用女性角度講在地歷史
楊舒晴 / 彰化報導
發布時間：
更新時間：
目次
臺灣各縣市攏有推出女性路線的導覽活動，彰化夢想館佇今年也規劃出一條彰化市的女性路線，這陣當咧進行導覽員的培訓課程，欲用女性的角度，講出在地的故事。（此則新聞標題、導言、內文皆為臺語文。）
倒手爿是查埔
伊的喙是按怎
喙開開的
彼爿的喙
查某的喙是合起來的
遮是彰化開化寺，廟前這對石獅，倒手爿公的喙開開，代表查埔是出喙咧賺錢，正手爿這隻母的喙合起來，身軀邊佮有獅仔囝，這是較早社會重男輕女的表現，彰化夢想館今年規劃一條彰化女路的導覽路線，欲用女性的角度來看過去的歷史發展
導覽老師 陳美娟
以咱查某囡仔的路線
來考慮這擺
譬如講我咧 攏是火車頭
慢慢仔行
行到孔子廟
一直行到美術館
所以這个路途當中
我會揣佮阮查某囡仔有相關的
對彰化火車頭出發，先過經過日本時代的高賓閣酒家，女性做家庭代工的布市，最後行到臺灣唯一一間有獨立建築的彰化節孝祠，主辦單位目前當咧進行在地女性導覽員的培訓，予學員實際行一逝，體會在地的女性故事
受訓導覽員
早期女性干焦會當做
廚房 洗菜
抑是服務人的工課
查某人其實嘛會使做足濟代誌
是干焦講以前無法度看覓咧
受訓導覽員
這馬的時代是以男女平等
所以我感覺若瞭解這个宗教文化
以及提升咱女性的一寡仔觀念
是足好的概念
主辦單位表示，這擺行的路線其實是彰化市足有名的景點，但是過去攏無注意著佇遮的歷史發展過程，其實有濟濟在地文化故事，希望透過女性路線的導覽，予民眾思考生活的性別平等議題。
洪家馨/編輯
