受洘旱佮低溫影響 阿里山春茶比舊年減30%
林緯廷 / 嘉義報導
發布時間：
更新時間：
嘉義阿里山茶區的春仔茶，今年受著洘旱閣有低溫的影響，產季並往過慢1、2禮拜，總產量嘛並舊年減少3成，所以一寡茶農的茶佇比賽了後，隨賣了了。(本則新聞標題、導言、內文皆為臺文)
民眾坐佇擔仔位頭前，等欲來啉今年大阿里山茶區的春茶，但是今年來參加的茶農比舊年閣較少，茶農講因為減產的關係，所以春茶是逐家搶欲買。
茶農 邱詩富：「氣候的關係，所以今年像阮阿里山這爿的茶區，茶農大部份收成攏減三成以上。今年比賽茶的點數閣少，但是民眾買的狀況誠好，咱看今年後壁遮空的擔仔位，真濟人毋是無來，是因為茶攏已經賣完。」
民眾：「頭仔是有感覺著可能會買無，因為今年的雨較少。今仔日有買著茶，感覺誠滿意。」
茶農表示，以前欲來茶展擺擔攏愛搶位，今年比賽送件的茶減少3成左右，成績出來了後，毋但民眾會買，農會嘛會向茶農買著獎的茶，所以茶才會好價閣搶市。
民眾：「今年的茶真好，但是產量有較少。」
茶農 林相卿：「今年產量有閣較少，品質較好、買氣嘛較熱。平均一斤茶大賣攏加五十至一百箍左右。」
梅山農會指出，往過舉辦茶展的時陣，驚擔仔位無夠引起爭議，所以攏會替有著獎的茶農留，今年因為減產，產生遮濟空擔仔位的狀況，實在是料想袂著。
買湘瑩/編輯
