戲劇"人選之人"演政治社會 展現臺灣多語環境

以政治幕僚做主題的職人劇《人選之人－造浪者》，佇臺灣引起濟濟話題，連紲兩禮拜佇串流平台排頭名。導演林君陽表示，內容使用濟濟社會議題，攏是使用佇臺灣討論度懸的議題、反映臺灣真實社會，也利用這寡議題帶動劇中人物的變化。

《人選之人－造浪者》導演 林君陽：「譬如講內底討論的廢死，討論的同婚，討論的環保議題，阮討論這寡議題攏毋是欲揣出答案，討論這寡議題反補轉來予這寡角色，向前行的線索」

劇中也使用濟濟台語元素，親像劇中「昂聲」這條歌，是歌手施文彬所唱的全台語歌；劇中角色也定使用台語，甚至有使用台文羅馬字，台語文作家鄭順聰認為，這齣戲是將台灣多語言的使用狀況，用真自然的方式展現出來。

臺語文作家 鄭順聰：「一半濫摻臺語、一寡濫摻華語，伊講的過程當中敢若足自然的，彼个就是咱看著彼種較老輩的，臺語的政治人物」

林君陽：「較轉去一種自然語的狀態，予逐家看咧看咧感覺親像咱現此時講話，也定定無仝語言交替使用」

林君陽表示，觀察著真實社會當中，台文羅馬字開始沓沓出現，所以也將這个元素藏佇戲劇當中；鄭順聰表示，這幾年濟濟戲劇、歌曲，攏開始使用台語文，毋但代表母語漸漸予大眾接受，也是少年這輩、當咧用新的方式紀錄現代的文化、佮生活。