學母語兼捌世事 央廣提供10種語言報新聞

用臺語唸出、專訪在台穆斯林餐廳的專題報導，這是中央廣播電台參獨立媒體《少年報導者》合作，推出的多語言讀新聞節目；由少年報導者提供專題新聞，中央廣播電台錄音，計共10種語言通收聽。

中央廣播電台董事長 賴秀如：「咱臺灣囡仔真有需要學母語，對東南亞來的新住民，in的第二代這馬欲開始學in的母語，閣欲融入咱臺灣的社會。英語和日語是足濟人攏愛聽」

少年報導者自露西亞拍烏克蘭的戰爭、發生了後，望囡仔也有接受專題新聞的管道，就開始推出華語讀新聞的計畫；今年四月開始，開始參中央廣播電台合作，增加台語、客語這寡母語，閣有日語、英語、東南亞語言、通予各族群青少年選擇。

《少年報導者》總監 楊惠君：「可能真濟訊息攏較片段，其實你欲培養好的公民素養，佮公民議題的討論品質，愛對細漢培養脈絡性的閱讀」

中央廣播電台董事長 賴秀如：「對囡仔來做報導，這是全世界的趨勢，in欲看新聞攏真濟，但是這內面有真濟是假訊息，正確的訊息是真重要」

因應時代潮流，少年報導者、央廣每個月至少會選擇兩篇適合親子共同收聽的專題報導，佇雙爿的網站、佮podcast平台播送；望透過各族群熟似的語言，強化兒少的媒體識讀能力佮人文素養。