共故鄉蓮藕產業揣轉來 牛斗山青年設合作社
林緯廷 / 嘉義報導
發布時間：
更新時間：
2021年、有一齣紀錄片，紀錄嘉義牛斗山、種蓮藕的艱苦，嘛介紹IN外銷國外的歷史。為著欲共好光景揣倒轉來，有幾若个少年輩、轉到牛斗山、招農民成立合作社，希望傳統的蓮藕產業、會當轉型、繼續發展。(本則新聞標題、導言、內文皆為臺文)
做伙佇舞台頂來翕相，這群少年的蓮藕農，初一早時做伙來參加牛斗山蓮藕果菜生產合作社的成立，IN講合作社的成立，替傳統的蓮藕產業帶來改變。
牛斗山蓮藕果菜生產合作社主席 劉智賢：「合作社愛認真來揣一寡通路，看欲按怎來賣蓮藕。予農民較認真去種，咱嘛認真來將這个所在發展起來，當然嘛希望看政府有才調閣共這合作社鬥相工。」
蓮藕青農 李家俊：「這馬是網路的時代，透過合作社會當有閣較濟宣傳方式來共咱這蓮藕推廣出去。」
嘉義縣民雄鄉的牛斗山，對過去到今攏是種臺灣種蓮藕的主要產地，煞因為人口的外流佮種作辛苦，予原本規庄攏咧種的蓮藕，賰無20外戶閣咧種，嘛因為紀錄片鴟鴞之手放送，予沒落產業開始來改變。
老鷹之手紀錄片導演 賴麗君：「阮翕紀錄片的時陣是40公頃，"老鷹之手"放送了後一直延續彼个效應到今，聽講種作面積已經增加到70公頃。」
蓮藕青農 蔡家豪：「蓮藕算有一段時間就是沒落去，是尾仔去想一寡物仔做這物件出來，了後庄內遮的人攏有綴落去做。」
合作社表示，進前的蓮藕攏是用手落去挖，賣的方式嘛是逐己揣廠商來賣，合作社成立的目標，除了欲改變過去收成的方式，嘛欲替蓮藕來申請生產履歷，希望予牛斗山這個所在，會當透過種作蓮藕，閣一擺來發展地方的產業。
買湘瑩/編輯
2022杭州亞運 台灣百金之路
