新竹路面雄雄破一大空 電動車規台落落3米深
張君豪 / 新竹報導
發布時間：
更新時間：
新竹縣一搭建案邊仔的車路，今仔日雄雄破一个4公尺闊、3公尺深的空，有一台今仔買無一個月的特斯拉新車，嘛直接落落去這个窟仔內底。而且這已經是附近第5擺發生車路破空，所以縣府嘛先要求邊仔的建案愛先停工。(本則新聞標題、導言、內文皆為臺文)
原本好好停佇停車格的車輛，雄雄落落去窟仔內底，倚過去看、路面竟然出現一个大窟仔，破一大空。車主看著這款狀況感覺真無奈。
受害車主：「交車無到一個月，真予人煩惱這搭。（敢有感覺心足疼) 無法度，就拄著矣，佳哉人無佇車裡。」
附近的民眾怨嘆講，這條路已經毋是第一擺發生意外，過去這3个月內就已經發生過3擺，嘛有民眾質疑攏是附近當咧施工的工地害的。
民眾：「路已經出現無平的狀況，已經鋪過幾若擺矣。」
竹北市十興里長 毛振福：「已經發生過五六擺矣，附近的居民是誠煩惱。」
縣政府接到通報，嘛趕緊封鎖道路，通知附近工地的建商，針對公共設施，先做安全補強，目前已經要求建商愛隨停工。
新竹縣工務處長 江良淵：「要求工地停工，嘛要求工地派機具來挖路面了解。目前已經請專案小組，成員有包括建築師、結構技師來現場勘查。」
建設公司協理 劉進乾：「一般崩去應該會佇工地邊仔，應該是佇基地邊。這馬發生佇遮，所以阮嘛是愛請人來鑑定。」
新竹地檢署下晡嘛派人到現場調查，縣府嘛會針對附近道路進行24小時監測，紲落來會請專家學者對地質狀況展開調查。
買湘瑩/編輯
