清明連假上尾日 國道往北恐驚會窒到下暗8點
郭柏均 張育睿 / 臺北報導
發布時間：
更新時間：
今仔日是清明連假上尾工，各地對下晡開始攏出現上北的車陣，可能愛窒到暗時八點車才會較好走。明仔載開始上班上課也愛紮雨傘，因為鋒面倚近臺灣，天氣開始無穩定。今仔日玉山觀測站佇下晡三點捅也有落冰角，外島的金門馬祖也開始落雨。(本則新聞標題、導言、內文皆為臺文)
對高速公路局1968網站看會著國五上北宜蘭到頭城，就算已經實施高乘載管制，車陣猶是排甲躼躼長；假期上尾一工下晡，各地國道攏出現上北車陣，高速公路局估計，愛等到七、八點了後，窒車狀況才會沓沓消敨。
高公局國道路況預報員 陳文瑜：「到下晡三點為止，國道全線交通量是57.5百萬車公里。估計今仔日交通量是110百萬車公里，到下晡三點國五北向雪隧通過量大約2萬7千輛次，並舊年仝期增加2%。」
玉山一片白茫茫，冰角一直落落來，因為對流系統影響，玉山下晡三點外開始落冰角。鋒面當咧接近台灣，天氣開始無穩定初五台南以北、東半部雲濟，外島金門、馬祖已經開始落雨；初六台灣各地頭也攏會開始落雨。
中央氣象局預報員 葉致均：「這个鋒面較厚的雲系咧往東爿走，所以這个鋒面系統對明仔載開始就會影響臺灣。臺灣各地佮外島金門馬祖攏是較會有短暫陣雨抑是雷雨，落雨的狀況可能猶是愛看當時的對流發展。對流發展若旺，無排除有霆雷佮強陣風等等天氣現象。中南部地區目前看起來局部短暫陣雨猶是雷雨為主，對解救洘旱可能猶是真有限。」
氣象局表示，初六雨水小停的時陣，猶是可能有日頭出現，各地高溫會到28度左右，是較濕熱的天氣型態，雨水到初八就會較少；溫度方面初七開始，會因為東北季風增強，北部地區可能落到16度。
鄭雅存/編輯
