國立歷史博物館佇2018年開始整修，按算今年12月底欲重新試營運，今仔日特別先推出厝頂修整的影片，紀錄師傅修理古蹟的辛苦。(這條新聞標題、前言是臺語文。)
青色的厝瓦是國立歷史博物館的特點，清代樣式真濟走獸等等閣愛考究，影片紀錄師傅按怎修復，也講出IN的辛苦，有做了欲40冬的師傅就講，參與修復也是咧修復人才。
師傅王榮貴講:「幕後的師傅，通常攏藏佇後壁看袂著，社會較無注重師傅的身份，就較僫吸引少年人投入。」
王榮貴講，這幾冬政府推動老厝、古蹟修復，全台灣的師傅，老經驗的可能才賰五、六十个甚至閣較少，年紀平均佇50歲左右。也因為培養一个師傅至少愛十冬，所以真僫傳承。這馬文資局有開一寡相關培育的課程，雖然起步較晏總是贏過啥物攏無做。
文化部長史哲講:「咱過去定講，重視工藝工藝，但攏重視彼个藝，工攏無重視，工藝的偉大，其實是透過人的力量產生的藝術成就。」
文化部也表示，這幾冬相連紲推動產學合作等計畫。這改史博館用這支轉來厝裡(厝瓦篇)的影像記錄，予外界透過認捌遮的建築師傅。館長也表示，這改修理厝頂總共用了7萬8千外片的厝瓦，原底舊的6千外片厝瓦，會成做文創商品再利用，也望佇年底重新開館。
