白色恐怖受難者陳列 出回憶冊.記錄歷史創傷
買湘瑩 莊浚佑／臺北報導
發布時間：
更新時間：
目次
白色恐怖受難者陳列，佇今年新出版的回憶冊「殘骸書」，共坐監期間便講就喉滇的記持展現出來，佮民眾做伙來感受。
「予人驚惶，就是極權統治的重要基礎」。政治受難者兼散文作家陳列今年新出版回憶冊「殘骸書」，記錄伊坐監期間的見聞，伊講，回憶是傷人的。
殘骸書作者陳列表示：「回憶是真傷人的，這款回憶不是干焦我個人，會想起其他受難者，想起彼个時代，想起彼當陣的歷史，阮是按怎行過來的，對我來講是真大的折磨佮痛苦，我定定感覺行入一个，罩雺罩真厚的荒野，抑是一个樹林，有足濟路通行，但是你愛去選擇行佗一條，有當時無定著有雙叉路，抑是根本無路我毋知欲按怎。」
陳列表示，會將冊名號做「殘骸」，是因為受難記持囥佇心內傷久，對毋敢講到毋知欲按怎講，彼款心境的變化漸漸予記持變做破碎，想欲轉做文字寫落來，煞忽然間捎無摠。國家文化藝術基金會董事長向陽認為，殘骸書詳細講著監獄的環境佮受刑的情形，望現代人有警覺。
國家文化藝術基金會董事長向陽表示：「這本冊內底有真濟血，真濟目屎，我認為佇21世紀的今仔日，回頭去看20世紀的白色恐怖，會當予咱一寡警覺，臺灣愛閣較自由 閣較有人權，咱對囝孫才有交代。」
記錄白色恐怖歷史的「殘骸書」，封面特別用白紙設計，而且冊裡無分章節佮目錄，望讀者綴陳列佮同期受難者，感受彼款破碎的生活記持。
陳玟芯/編輯
專題｜改造地獄路 台灣行人路為何難行？
